ТМД лингвистері Ақтөбеде

Түркия, Өзбекстан, Тәжікстан, Татарстан, Ресей және Қазақстанның лингвистері бүгін Ақтөбеде ғылыми-теориялық конференцияда бас қосты. Талқыланған тақырып: "Көптілділік - мәдениеттер үнқатысымы". Өзбекстан мемлекеттік әлем тілдері университетінің профессоры Маханбет Жүсіпов көп жылдан бері жаһан тілдерін, оның ұлттар қатынасына әсерін зерттеумен келеді. Ғалымның айтуынша, қазіргі ғылыми технология сағат сайын жаңарып отырған заманда тілдік қатынас өте жоғары деңгейде дамуда. Әлемнің бір шеті мен екінші шетіндегі тұрғындар бір-бірімен ғаламтор арқылы түсінісіп, еш қиындықсыз байланысып жатыр. Бұл қуантарлық жайт, дейді ғалым. Өзбекстандық ғалым тілді меңгерушіліктің, яғни билингвизимнің екі түрін келтіреді: табиғи және жасанды. Табиғи билингвизм бұл - баланың ана тілінен бөлек тілдерді аулада, көшеде, ойын алаңында үйренуі. Ал, жасанды билингвизмде адам қайсыбір тілді балабақшада, мектепте, оқу орындарында сол тілді үйретуші мұғалімнен меңгереді. Профессор егер осы екі әдіс қоса қолданылса, тілді меңгеруде тамаша нәтижеге қол жеткізуге болатындығын айтады. Көптілділіктің бірнеше ұлттардың мәдени қарым-қатынасына әсері туралы ойларын бүгінгі конференцияда Ресейдің халықтар достығы университетінің, Түркиядағы Муғла Сытқы Кочман университетінің, Қазан университетінің, Назарбаев университетінің, басқа да ТМД-дағы атақты оқу орындарының ғалымдары ортаға салды.