Адӕмон сфӕлдыстады хӕдзар ныр хæссы Уарзиаты Хадзысмелы ном

Ирыстоны национ культурӕйы тыхæн фылдæр хатт бындур фæзыны фæсвæд ран. Абон дӕр, цалынмӕ интернеты хъомысыл быцӕу цæуы, уӕдмӕ хъӕуты культурӕйы хӕдзӕртты рæзынц фидар хореографион ӕмӕ театралон коллективтӕ. Æгас республикӕйы курдиæттæ куыд агургæ сты, уый зоны Битарты Ларисӕ.  — Махмӕ цӕуынц, зӕгъӕм, адӕмон сфӕлдыстады жанртӕм гӕсгӕ фестивальтӕ. Афтӕмӕй, курдиæттæ ссарӕм театралон сфӕлдыстады. Эстрадон вокал — тынг бирӕ сты ӕрыгон зарӕггӕнджытӕ, зӕрдӕргъӕвд, бирæтæ — хӕххон хъӕуты, дӕрддзӕф районты. Ӕмӕ сын ӕххуыс кӕнӕм. Нӕ театралон коллективтӕм, фӕсивӕд нӕ цӕуынц, уый зӕгъын мӕ бон нӕу. Кӕм цавӕр режиссер ис, уымӕ гæсгæ. Диссаджы коллектив, зӕгъӕм ис, Ӕрӕфы районы, тынг хорз кусы махмӕ Мӕздӕджы адӕмон театр дæр. Фӕлӕ хъӕуты коллективтӕ, къордтӕ ӕмӕ студитӕн се 'ппӕтӕн иунӕгӕй рæзын сæ бон нӕ уыдаид — хъӕуы сын æппынæдзух ӕххуыс. Уыдонӕн сӕ сӕйраг рахӕцӕн у адӕмон сфӕлдыстады хӕдзар. Стыр командӕ районты чысыл клубтӕн курдиӕттӕ рӕзын кӕнынӕн ӕмӕ традицитӕ бахъахъхъӕнынӕн куыд ӕххуыс кӕны, уый тыххӕй дзуры Лалыты Хъазыбег. Этнокультурон бынтӕ бахъахъхъӕнын у æппынæдзухы архайд, фӕлӕ адӕмон сфӕлдыстады ӕппӕт жанртӕ абон парахат не сты. Кæд хореографи ӕмӕ театртӕ æнтыстджынæй рæзынц, уæд иуӕй-иу традицион музыкалон здӕхтытӕ та рохуаты зайынц. - Махмӕ тынг ӕвзӕр кусын райдыдта хорты жанр. Ома, кӕд раздӕр республикӕйы героикон зарӕджы хорз хортӕ уыд, уӕд сæ абон 'нгуылдзтыл банымайӕн ис, зӕгъӕн ис, уыцы жанр фæцудыдта, фӕлӕ ма сæ уӕддӕр сабыргай ӕмбырд кӕнӕм. Зӕгъӕм, мӕнӕ Ӕрыдоны районы уыдис героикон зарӕджы хор, Сунжæйы уыд хъайтарон зарӕджы хорз хор, уый дӕр нал ис. Ома ацы жанрмӕ фылдӕр ӕргом аздахын хъӕуы. Музыкалон ӕмӕ фольклорон ӕркасты æмрӕнхъ ам ӕххуыс кӕнынц адӕмон аивадæн. Специалисттæ се 'ргом раздахынц, къухӕй ӕвӕджиауы дзаумӕттӕ чи аразы, ахӕм дӕснытӕм: хъӕдын зырнӕйзылдӕй, сызгъӕрин хуыдæй ӕмӕ национ куклаты онг. — Хайад ӕмархайд кӕны адӕмон дӕснытимӕ, фылдӕр та адӕмон дӕснытимӕ – хæдахуыртимæ. Ам равдыстыты вӕййы хъӕдӕрмӕг ӕмӕ сылгоймаджы ӕрмгуыст дӕр, зæгъæм, сызгъӕрин хуыд. Арæх нæм равдыстытæ саразынц, се 'ппӕты номӕй нӕ ранымайдзынӕн, фӕлӕ нӕ равдыстыты ӕмӕ семинарты арӕх вӕййы куклатӕ сӕрмагондӕй адӕмон. Ныртӕккӕ ам аразынц стыр интерактивон интернет-архив, уырдӕм бацӕудзӕн, æмбал кæмæн нæй, ахæм 20 объекты. Фольклоры дӕсны Царахаты Индирӕ куыд зӕгъы, афтӕмӕй уыцы фӕллой ныридӕгӕн хорзыл банымадтой Мӕскуыйы эксперттæ. Уыимæ ма йæ фидарæй уырны, уый сæ фæстаг æнтыстдзинад кæй нæу, уый. Уымæн æмæ ныр æмдзу кæндзысты цы кадджын ном сын радтой, уый фарнимæ. Республикæйы 123 клубы куыст у цæттæгæнæн хайады хæс. Фӕлӕ абон ам статистикӕйы кой нӕ кӕнынц. Адӕмон сфӕлдыстады хӕдзарӕн официалон ӕгъдауӕй лӕвӕрд ӕрцыд хореограф Уарзиаты Хадзысмелы ном. Уарзиаты Хадзысмелы тыххӕй дзурын мӕ бон тынг бирӕ у, уымӕн ӕмӕ фыццаг бонӕй фӕстӕмӕ иумæ куыстам. Уый стыр амонд у, фæлæ бӕрнондзинад дӕр афтæ у. Хадзысмелы, ӕз мӕхицӕн бахъуыды кодтон — дисциплинæйæ. Дыккаджы та алы ног фæзылдмæ дæр стыр цымыдисдзинадæй. Уарзиаты Хадзысмел адӕмон ӕгъдӕуттӕ сценӕмӕ хаста хореографийы хуызы, кафт фестын кодта традициты цардӕгас архив. Лалыты Хъазыбеджы уырны: Ирыстоны фыццаг профессионалон балетмейстеры ном æддаг къулыл феххуыс уыдзӕн фӕсивӕды сӕ уидӕгтӕм сцымыдис кæнынæн. Нырма хъӕуты цардӕгас сты традицитӕ, æвзаг ӕмӕ менталитет — Ирыстоны культурон кодӕн тас ницӕмӕй у. Ӕмӕ Адӕмон сфӕлдыстады хӕдзарӕн Уарзиаты Хадзысмелы ном раттын бӕлвырд кӕны: дӕсныйы бынтӕ дарддӕр цӕрынц, абон алы клубы дӕр уыцы культурӕ чи хъахъхъӕны, уыцы адӕмы 'хсӕн.