Сергей Меняйло амыдта ӕрвылкъуырион аппаратон ӕмбырд

Артаджы уавӕрмæ дарддӕр дӕр цӕстдард цӕуы. Цӕгат Ирыстоны нефты æвæрæнты ныртӕккӕ ис 1 мин 489 тоннӕйы бензин ӕмӕ 1 мин 425 тоннӕйы дизел. Уый тыххæй фехъусын кодтой æрвылкъуырион аппаратон æмбырды. Ацыд республикæйы сæргълæууæг Сергей Меняйлойы разамындæй. Фӕндагыл ма ис 1 мин 920 тоннӕйы бензин ӕмӕ 2 мин 586 тоннӕйы дизел. Ӕрныхас кодтой Арвыкомы фӕндаджы уавӕрыл дӕр. Дыууӕрдӕм дæр контролон-уадзæн пункт «Уӕллаг Ларс»-ы сæрты ахызт 26 мин хæдтулгæйæ фылдӕр ӕмӕ 70 мин адӕймаджы. Электрон рады ис 256 уӕзласӕн машинӕйы. Республикӕйы иртасынц æхснырсæг æмæ гриппимæ баст уавæр. Сывӕллӕтты рӕвдауӕндӕтты сабиты 12%-мæ раиртæстой низы миниуджытæ, скъолаты вирус кæмæ ис, уыдон сты 9%. Уæрæсейы фæлхасгæнджытæм цæстдарды управленийы бӕрӕггӕнӕнтӕм гӕсгӕ, ивгъуыд къуырийы регистрацигонд ӕрцыд COVID-19 дыууӕ цауы. Уавӕрмæ æппынæдзух сæ цæст дарынц дзуапдæттæг кусæндæттæ.