Æфӕдзы райдианӕй республикӕйы кадрты центр куысты бынӕттӕ ссардта 716 куыстагурӕгӕн

Бӕрзонд температурӕ ӕмӕ моторты уынӕр. Хъараты Азӕмӕтӕй бирӕ аразгӕ у Дзӕуджыхъӕуы цӕрджыты хӕдзӕрттӕм хъарм ӕнӕкъуылымпыйӕ дӕттыны хъуыддаджы. Электромонтер кæсы зилæгонтæм, йæ цæст дары цъирæнты куыстмæ. Ватутины ӕмӕ Неведомскийы уынгты сӕдӕгай фатертӕ хъарм кӕнынц йӕ комкоммӕ архайдӕй. Куысты бынаты уæвгæйæ арæхдæр архайын гæрзтимæ, æмбæлгæ уавæрмæ сæ æркæнын, базилын сæм, телтæ баиу кæнын, æххæстæй сæ бацæттæ кæнын. Мӕйы размӕ дæр ма нæлгоймаджы хъуыддаг бынтон æндæрхуызон уыд. Уæрæсейы æфсæнвæндæгты йæ куыст ныууадзыны фæстæ Азæмæт дарддӕр цы акодтаид, уый нал зыдта. Куыстагур арвыста афӕдз — сфӕнд кодта кадрты центрмӕ бацӕуын. Мæ дæсныйадмæ гæсгæ куыст дæргъвæтин рæстæг агуырдтон, фæлæ мæ бон ссарын нæ уыд. Уый фæстæ фæсидтæн Кадрты центрмæ, уым мын куыст ссардтой Водоканалы. Ам фæллой кæнын мæймæ хæстæг, мыздæй æмæ уавæртæй разы дæн. Сæрмагонд уæлæдарæс æмæ кусæнгæрзтæй мæ сифтонг кодтой, коллектив зæрдæхæлар. Ахӕм кусджытыл Водоканалы ӕхсызгонæй сæмбæлынц. Организацийæн бантыст 3 мин 500 куысты бынатӕй фылдӕр саразын. Ӕрӕджы та разамынд мызд фӕфылдӕр кодта ӕмӕ коллективӕн снысан кодта лӕвар медицинон ӕркаст. Фæзынд нæм нæхи нырыккон автомобилон парк. Абон Водоканалы бæрны ис сæрмагонд техникæйы 180 иуæгæй фылдæр. Махæн ахсджиаг у, цæмæй Водоканал рæза æрмæст куыд кондадон куыстуат нæ, фæлæ нырыккон уавæртимæ куысты бынæттæ кæм ис, дæсныйады рæзынæн фадæттæ кæм ис, ахæм организаци. Кадрты центрмæ фæсидынц сӕдӕгӕйттӕй, зæгъæм, афæдзы райдианæй æххуыс бацагуырдтой 716 адæймаджы. Куыстмæ райсыны фæдыл æмныхас ацæуын, хи гæнæнтæн аргъ скæнын — куыстуаты архайынц ӕппӕты растдӕр уынаффæ рахæссыныл. Æрӕджы та ма бынаты ацыд егъау армукъа. Кадрты центр рæгъмæ рахæссы, фæллойадон базарады цы куысты бынæттæ вæййы, уыдон. Куыстагурджытæн фадат вæййы куыстуæтты минæвæрттимæ аныхас кæнынæн, фæлтæрддзинад фæфылдæр кæнынæн, уæлæмхасæн дæсныйад райсынæн. Армукъа саразыны фæстæ къухы бафтыд 18 адæймагæн куысты бынæттæ ссарын. Æрвылмæй центр лӕггад кӕны 1 мин 717 куыстагурӕгӕн — баххуыс кӕнын сӕ фылдӕрæн къухы бафты. Фаг у паспорт, ахуырады гӕххӕтт, фӕллойадон чиныг ӕмӕ рӕстӕмбис мызды ӕвдисӕндар равдисын. Курдиат бадæттæн ис комкоммæ хуызы, уыимæ онлайн портал "Работа В России"-йы уылты.