Чăваш Республикин наци вулавăшĕн пуçарăвĕпе 2015-мĕш çултанпа «Нарспие вулатпăр» пĕтĕм тĕнчери проект иртет. Çак проекта 29 çĕршывран тата 45 хуларан 120 ытла çын хутшăннă. Раççейпе Китайран, Францирен тата ытти патшалăхран унта хăйĕн пултарулăхĕпе паллаштаракан нумай. Кăçал та çак пуçару ака уйăхĕн 25-мĕшĕнче старт илнĕ. Эсир те авăн уйăхĕччен унта хутшăнма пултаратăр. Константин Ивановăн «Нарспи» спектакльне лартнăранпа 100 çул тата çак хайлав тăрăх опера хатĕрленĕренпе 55 çул çитнĕ ятпа йĕркеленĕ «Наци кĕтречĕ. Константин Иванова халалласа» Чăваш Республикин наци библиотекинче курав уçăлнă. «Нарспие вулатпăр» проекта Чăваш Ен Пуçлăхĕ Олег Николаев, республикăри культура министрĕ Светлана Каликова та хутшăнчĕç. «Нарспи вулатпăр» проекта хутшăнакансем хайсен ĕçĕсене электронлă адреспа Чăваш Республикин наци вулавăшне авăн уйăхĕччен ярса пама пултараççĕ