Саха театра эҕэрдэлиир! С днем рождения, Андрей Саввич!

От имени всего коллектива Саха академического театра им. П.А.Ойунского поздравляем нашего художественного руководителя Андрея Саввича Борисова с днем рождения! Ытыктабыллаах Андрей Саввич! Саха тыйаатырын айгыраабат ньыгыл акылаатыттан, туллаҥнаабат тулааһын баҕаналарыттан, өҕүллүбэт үрдүк өһүөлэриттэн биирдэстэрэ буолбут ытык-мааны уус-уран салайааччыбыт, киэн туттар тулааһыммыт, тапталлаах режиссербут! Эйигин тиийэн кэлбит төрөөбүт күҥҥүнэн Сахаҥ тыйаатырын бары дьоно, улаханныын-кыралыын, эдэрдиин-эмэнниин эйэҕэс эҕэрдэ тылбытын Эйиэхэ эттэхпит буоллун, үөмэхтэһэн тураммыт үөрэ-көтө эҕэрдэлээтэхпит буолуохтун! Саха тыйаатырын аптаах оҥочотун улуу муоралары уҥуордаан аан дойду акыйааныгар таһаарбыккынан, Ойуунускайы Шекспиры кытта биир кэккэҕэ туруоран, Саха омук култууратын айхаллаан өрө туппуккунан бүтүн Саха дьоно киэн туттабыт! Аны да айар талааныҥ ахсыыры билбэтин, салайар сатабылыҥ сайда, кыаҕыра туруохтун! Соруммут сүдү былааннарыҥ олоххо киирэ турдуннар! Тус бэйэҥ олоххор тулхадыйбат туруктан, ускуустуба киһитин уһунтан уһун үйэлээх, умсулҕанннах уйулҕалаах улахан олоҕун олор! Дом! Дом! Дом!