Алæмæттаг скрипкæ. Автор Николай Гумилёв. Текст кæсы Б

НИКОЛАЙ ГУМИЛЁВ Алæмæттаг скрипкæ Валерий Брюсовæн Ды куыд хорз лæппу дæ, хъæлдзæг, о, куыд райдзаст у дæ бахудт, Ма кур ацы амонд, ма кур, – уый хъæстæ кæны æппæт. Ды нæ зоныс: ацы скрипкæ тар, æмбæхст тыхтимæ баст у, Хъазт райдайæгæн йæ хъысмæт у æбуалгъ тасæй æххæст! Ацы алæмæттаг скрипкæ чи райса йæ барджын арммæ, – Уымæн фесæфдзæн æнустæм йе ‘нæмæт цæстыты рухс, Дæлимонтæ уарзынц хъусын ацы ʻвæджиауы цагъдмæ, Скрипкæйыл цæгъдджыты фæдыл сонт бирæгътæ зилынц, хъус! Хъуамæ ‘нæрлæугæйæ хъуыса ацы тагты зард, æрдиаг, Хъуамæ ‘нæрлæугæйæ кафа скрипкæйы æрра æрдын, Хур, фыдхъызт, тымыгъы хъаза, раст йæ зæрдæйы фæндиаг, Дард Ныгуылæны цъæх артмæ, Скæсæны пиллоны бын. Ды куы ферхъæцай фæлладæй, æмæ иу рæдыд куы ‘руадзай, – Иу змæлд дæр дæ бон нæ уыдзæн, нæ улæфт, нæдæр цъæхахст, – Уайтагъд сонт бирæгътæ иумæ, тугмондаг, æвирхъау бардзæй Урс-урсид дæнгæгтæй хъуырмæ уæд фæлæбурдзысты ‘васт. Бамбардзынæ уæд, цы сайдæй разылди дæуыл æппæт дæр, Хъæлдзæгæй, æнæмæт зардæй зæрдæ чи ирхæфста знон. Уæд азары комулæфтæй уайтагъд асæлдзысты уæнгтæ, Уарзон чызг кæудзæн, хæлар та хъуыдыты ныгъуылдзæн, зон. Дарддæр, лæппу! Ам нæ уыдзæн нæ хъæлдзæг цард, нæ хæзнатæ! Фæлæ æз уынын – ды худыс, уæдæ размæ – сгар, æвзар. Дæу уæд алæмæттаг скрипкæ, ‘дæрсгæ ʻвиллон сырдтæм бафсæр, Æмæ скрипкæйыл цæгъдæджы ‘вирхъау, кадджын мæлæт ссар! Уырыссагæй раивта Плиты Инал Текст кæсы Бекъойты Филипп.