Анатолий Бурнашев: “Дойдуга бэриниилээх буолуу тэлгэһэттэн саҕаланар”

Саха дьоно бары дэриэбинэ үтүөкэн тэлгэһэтиттэн кынат анньынан таҕыстахпыт. Онон тэлгэһэ, тиэргэн – барыбытыгар ытык өйдөбүл. Анатолий Бурнашев бу хайысханы тутуһан, үөрэнээччилэрин “оҕолорбор” диэн сылаастык ааттаан кинилэргэ анаммыт үлэтин хайысхатын хайгыы, сөҕө-махтайа көрөҕүн. Саха киһитэ тэлгэһэлээх буолуохтаах. Оҕону тэлгэһэ иһигэр иитииттэн үчүгэй атын туох баар үһү! Сахалыы балаҕан, мас дьиэ, хотон, сылгы-сүөһү – бу оҕо сахалыы куттаах буолан иитиллэн, саха саарына буолан тахсарыгар бигэ оҥкулу уурара саарбахтаммат.