Муус устар 7 күнүгэр Чурапчы культуратын үлэһиттэрэ ыаллыы сытар Амма улууһугар баран көрөн кэллибит

Дойду үрдүнэн гражданскай сэрии бүтэһик улахан кыргыһыыта Амма Абаҕатыгар Саһыл Сыһыы алааһыгар буолбута. Бу историческэй сиргэ-уокка кулун тутар 25 күнүгэр «Саһыл Сыһыы» комплекс аһыллыбыта. Муус устар 7 күнүгэр Чурапчы культуратын үлэһиттэрэ ыаллыы сытар Амма улууһугар баран көрөн кэллибит. Манна 18 күнү-түүнү быһа А.Н.Карманов уһаайбатыгар И.Я.Строд этэрээтин кытары оборонаны тута сылдьыбыт дьиэтэ баар. Бу дьиэ биир маһыгар «Посетил Строд из Москвы» диэн Строд бэйэтэ суруйбута баар. Дьиэҕэ сыһыары хотонноох. Бу хотоҥҥо от тэлгэтэн баран бааһырбыт дьону эмтээбиттэр. Генерал Пепеляев Амманы сэриилиир биир төрүөтүнэн буолбут кыһыҥҥы хаһаас, ону көрдөрөр умуһах баар. Дьиэ тула оборонаны көрдөрөр оҥоһуктар бааллар. Холобур, Саһыл Сыһыыга буолбут кыргыһыыны “ледяная осада” диэн ааттыыллара, бу кыһыллар көмүскэммит ньымаларыттан тахсыбыт аат эбит. Комплекс биир өттүгэр кыргыһыы иннинээҕи олох көстөр, этнографияны сырдатар. Манна биир олус кэрэхсэбиллээҕэ үктээһин миэлинсэни реконструкциялаабыттара буолар. «Саһыл Сыһыы» историятын бэрт сиһилии история учуутала, кыраайы үөрэтээччи Александра Никитична Карманова экскурсиялаата